«ЯК МАТОВУ САД РАНГ» – ТАҶАССУМИ ҲУНАР ВА ЗЕБОИИ ФАРҲАНГИ МИЛЛӢ

Санаи 16 апрели соли 2026 дар шаҳри Кӯлоб даври шаҳрии Фестивал-озмуни ҷумҳуриявӣ таҳти унвони «Як матову сад ранг» бо иштироки кормандони Мақомоти иҷроияи ҳокимияти давлатии шаҳр дар фазои тантанавӣ ва рӯҳияи баланди миллӣ баргузор гардид.

Дар ин чорабинии пуршукуҳ омӯзгорон ва донишҷӯёни Муассисаи давлатии таълимии «Коллеҷи тиббии шаҳри Кӯлоб ба номи Раҳмонзода Раҳматулло Азиз» бо либосҳои миллии зебо ва рангоранг ҳунару фарҳанги тоҷиконро муаррифӣ намуда, таваҷҷуҳи ҳозиринро ба худ ҷалб карданд.

«Як матову сад ранг» танҳо як ибора нест — он фалсафаи зиндагист. Ин сухан аз он шаҳодат медиҳад, ки зиндагӣ мисли матои нозук бо садҳо ранг оро ёфтааст: шодӣ ва ғам, умед ва орзу, меҳнат ва комёбӣ. Ҳар инсон метавонад бо рафтору андешаҳои нек зиндагии худро рангоранг ва зебо созад.

Дар фарҳанги пурғановати тоҷикон, матоъбофӣ ва гулдӯзӣ рамзи завқи баланд, заҳмати софдилона ва ҳунари воло ба шумор меравад. Ҳар нақшу нигор қиссае дорад, ҳар ранг маъние. Ин ҳама бозгӯи таърих, анъана ва рӯҳи зиндаи миллат аст.

Ин фестивал на танҳо намоиши либосҳои миллӣ, балки ҷашни худшиносӣ, эҳёи арзишҳои миллӣ ва арҷгузорӣ ба мероси фарҳангии мост.

Малоҳати Қурбон

Муовини директор оид ба корҳои тарбиявии МДТ «Коллеҷи тиббии ш.Кӯлоб ба номи Раҳмонзода.Р.А»

Пеш 1 то 8 саҳифа Баъдӣ