29 ҲАЗОР МУТАХАССИС — НАТИҶАИ МЕҲНАТИ ПУРСАМАРИ КОЛЛЕҶ: ЗИЁДА АЗ 14 ҲАЗОР ҲАМШИРА — ИФТИХОРИ КОЛЛЕҶ

Дар Муассисаи давлатии таълимии «Коллеҷи тиббии шаҳри Кӯлоб ба номи Раҳмонзода Раҳматулло Азиз» бахшида ба Рӯзи касбии ҳамшираҳои шафқат аз ҷониби кафедраи «Асосҳои кори ҳамширагӣ» конференсияи илмӣ-назариявӣ таҳти унвони «Ҳамшираҳои шафқат — мададгори мардум» бо ташаббуси омӯзгори кафедраи мазкур Одинаева Гулнора баргузор гардид.

Дар конференсия муовини директор оид ба корҳои таълимӣ Нуруллоён Сарвиноз, муовини директор оид ба илм ва муносибатҳои байналмилалӣ Маҳмудзода Қумринисо, муовини директор оид ба таҷрибаомӯзӣ Эмомова Сайлигул, декани факултети «Кори ҳамширагӣ» Хушбахтзода Абдуфаёз, мудири шуъбаи илмӣ-методӣ Абдураҳмонов Карим ва дигар омӯзгорону донишҷӯён иштирок намуданд.

Дар ҷараёни конференсия оид ба ҳаёт ва фаъолияти асосгузори фанни «Асосҳои кори ҳамширагӣ» — Флоренс Найтингейл маърӯзаҳои пурмуҳтаво пешниҳод гардида, донишҷӯён маҳорату малакаи амалии худро ба намоиш гузоштанд. Иштирокчиён тавонистанд сатҳи баланди омодагии касбӣ, масъулиятшиносӣ ва қобилияти корбариро нишон диҳанд.

Қобили зикр аст, ки ҳамшираҳои тиббӣ яке аз гурӯҳҳои сершумортарини кормандони соҳаи тандурустӣ ба ҳисоб рафта, дар беморхонаҳо, марказҳои саломатӣ, дармонгоҳҳо, бунгоҳҳои тиббӣ, муассисаҳои таълимӣ ва илмӣ-тадқиқотӣ фаъолият менамоянд. Нақши онҳо дар ҳифзи саломатии ҷомеа хеле муҳим ва арзишманд мебошад.

Муовини директор оид ба корҳои таълимӣ Нуруллоён Сарвиноз дар баромади худ иброз дошт, ки: «Ногуфта намонад, ки аз солҳои аввали фаъолияти коллеҷ то имрӯз, яъне аз соли 1956 то соли 2025, муассиса тавонистааст дар омода намудани кадрҳои баландихтисоси соҳаи тиб саҳми назаррас гузорад. Дар ин давра зиёда аз 29 030 нафар мутахассис коллеҷро хатм намуда, имрӯз дар гӯшаву канори мамлакат ва берун аз он фаъолияти пурсамар доранд.

Аз ин шумора 14 458 нафар ихтисоси кори ҳамширагиро хатм карда, ҳамчун ҳамшираҳои соҳибтаҷриба ва масъулиятшинос дар ҳифзи саломатии ҷомеа хизмат менамоянд. Ин нишондодҳо далели равшани мақому нуфуз ва саҳми арзандаи коллеҷ дар рушди соҳаи тандурустии кишвар мебошанд.»

Ҳамшираи тиббӣ бояд дорои ахлоқи ҳамида, меҳрубонӣ, хайрхоҳӣ, сабру таҳаммул ва маданияти баланди муомила бошад. Зеро сухани нек метавонад ба инсон умед бахшад ва муносибати хуб дар шифои бемор нақши муассир дорад. Аз ин рӯ, ҳар як ҳамшираи тиббӣ бояд касби худро дӯст дошта, бо масъулият ва маҳорати баланди касбӣ фаъолияти худро ба роҳ монад.

Дар ҳақиқат: «Ҳамшира бояд дастони моҳир, чашмони уқоб, хиради мор ва дили шер дошта бошад.»

Бо чунин чорабиниҳои маърифатӣ ва илмӣ сатҳи дониш, ҷаҳонбинӣ ва маҳорати амалии донишҷӯён боз ҳам тақвият ёфта, ҳисси эҳтиром ба касби пуршарафи ҳамширагӣ дар қалби ҷавонон бештар мегардад.

Дар анҷоми конференсия мудири шуъбаи илмӣ-методӣ Абдураҳмонов Карим суханронӣ намуда, чунин иброз дошт:

«Чунин ҳамоишҳои илмӣ-назариявӣ барои таҳкими донишҳои назариявӣ, такмили малакаи касбӣ ва густариши ҷаҳонбинии илмии омӯзгорону донишҷӯён аҳамияти бузург доранд. Онҳо на танҳо сатҳи дониши иштирокчиёнро боло мебаранд, балки дар ташаккули шахсияти мутахассиси масъулиятшинос ва ватандӯст низ нақши муҳим мебозанд.

Ҳар як донишҷӯ бояд дарк намояд, ки касби ҳамширагӣ танҳо як ихтисос нест, балки рисолати инсонӣ ва хизмати содиқона ба ҷомеа мебошад. Аз ин рӯ, омӯзиш, таҷрибаандӯзӣ ва такмили доимии маҳорати касбӣ бояд ҳадафи асосии ҳар як донишҷӯ бошад.»

Дар фарҷом ӯ баргузории конференсияро шоистаи таҳсин арзёбӣ намуда, ба кори он ҷамъбаст бахшид.

Мирзозода Марҳабо

Мудири кафедраи «Асосҳои кори ҳамширагӣ»-и МДТ «Коллеҷи тиббии ш. Кӯлоб ба номи Раҳмонзода Р. А.»

Пеш 1 то 18 саҳифа Баъдӣ