МУҚОВИМАТ БА КОРРУПСИЯ – ОМИЛИ МУҲИМИ ТАҲКИМИ ДАВЛАТДОРӢ ВА РУШДИ УСТУВОР

Дар шароити ҷаҳони муосир мубориза бо коррупсия яке аз самтҳои афзалиятноки сиёсати давлатии ҳар як кишвари ҳуқуқбунёд ба шумор меравад. Коррупсия ҳамчун падидаи номатлуб ба рушди иқтисодӣ, адолати иҷтимоӣ ва эътимоди мардум ба сохторҳои давлатӣ таъсири манфӣ мерасонад. Аз ин рӯ, Ҷумҳурии Тоҷикистон низ аз рӯзҳои аввали соҳибистиқлолӣ масъалаи муқовимат ба коррупсияро ҳамчун вазифаи муҳими давлатӣ муайян намудааст.

Бо мақсади такмили сиёсати зиддикоррупсионӣ ва фароҳам овардани заминаи устувори ҳуқуқӣ, Стратегияи давлатии муқовимат ба коррупсия барои давраи то соли 2030 қабул гардидааст. Ҳадафи асосии ин стратегия ташаккули фазои оштинопазир нисбат ба коррупсия, баланд бардоштани маърифати ҳуқуқии аҳолӣ ва такмили механизмҳои пешгирии ҳуқуқвайронкуниҳои коррупсионӣ мебошад.

Яке аз самтҳои муҳим дар ин раванд баланд бардоштани масъулият ва сатҳи донишҳои касбии хизматчиёни давлатӣ ба ҳисоб меравад. Зеро маҳз фаъолияти шаффофу масъулиятноки онҳо метавонад заминаи эътимоди мардумро тақвият бахшад. Дар доираи барномаҳои амалкунанда миёни кормандони мақомоти давлатӣ машғулиятҳои омӯзишӣ, семинарҳо ва вохӯриҳои фаҳмондадиҳӣ баргузор мегарданд, ки ба таҳкими интизоми хизматӣ ва пешгирии омилҳои коррупсионӣ мусоидат мекунанд.

Самти дигар — рушди фазои ягонаи иттилоотӣ ва таъмини дастрасии шаҳрвандон ба иттилооти расмӣ мебошад. Тавассути сомонаҳои расмӣ, воситаҳои ахбори омма ва шабакаҳои иҷтимоӣ маълумоти зарурӣ ба ҷомеа пешниҳод мегардад. Ин иқдомҳо шаффофияти фаъолияти мақомоти давлатиро таъмин намуда, имконияти назорати ҷамъиятиро бештар мегардонад.

Дар ин ҷода нақши Агентии назорати давлатии молиявӣ ва мубориза бо коррупсияи Ҷумҳурии Тоҷикистон хеле муҳим мебошад. Агентӣ бо такя ба қонунгузории амалкунанда дар самти пешгирӣ, ошкор ва тафтиши ҷиноятҳои коррупсионӣ фаъолият бурда, барои бартараф намудани омилу шароитҳои ба коррупсия мусоидаткунанда тадбирҳои муассир меандешад. Ҳамзамон, корҳои тарғиботию фаҳмондадиҳӣ миёни аҳолӣ бо мақсади баланд бардоштани маърифати ҳуқуқӣ пайваста роҳандозӣ карда мешаванд.

Қобили зикр аст, ки мубориза бо коррупсия танҳо вазифаи як ниҳод ё сохтори алоҳида нест. Ин раванд иштироки фаъоли тамоми қишрҳои ҷомеа — хизматчиёни давлатӣ, зиёиён, ҷавонон ва ҳар як шаҳрванди ватандӯстро талаб менамояд. Зеро танҳо бо саъю кӯшиши муштарак метавон фазои солими иҷтимоӣ ва муҳити одилонаро таъмин кард.

Натиҷаи татбиқи босамари чорабиниҳои зиддикоррупсионӣ пеш аз ҳама дар таҳкими қонуният, баланд гардидани сатҳи эътимоди ҷомеа ба ҳокимияти давлатӣ ва фароҳам омадани шароити мусоид барои рушди иқтисодию иҷтимоӣ зоҳир мегардад. Ҷомеае, ки дар он адолат, шаффофият ва масъулият ҳукмфармост, метавонад ба сӯи пешрафти устувор ва ояндаи дурахшон қадам гузорад.

МДТ «Коллеҷи тиббии шаҳри Кӯлоб ба номи Раҳмонзода Раҳматулло Азиз» бо дарки масъулияти баланди шаҳрвандӣ изҳор менамояд, ки мубориза бо коррупсия яке аз самтҳои афзалиятноки фаъолияти таълимиву тарбиявӣ маҳсуб меёбад. Роҳбарият ва омӯзгорони муассиса дар баробари таълими донишҳои касбӣ, ба тарбияи ҳисси масъулиятшиносӣ, поквиҷдонӣ ва эҳтиром ба қонун дар миёни донишҷӯён аҳаммияти ҷиддӣ медиҳанд.

Зеро тарбияи мутахассисони соҳибкасб ва ҳамзамон дорои ахлоқи ҳамидаву мавқеи устувори шаҳрвандӣ, заминаи муҳими ташаккули ҷомеаи солим ва одилона мебошад. Мо бовар дорем, ки танҳо бо заҳмати софдилона, эҳтиром ба арзишҳои миллӣ ва риояи қатъии қонун метавон ба рушди устувори давлат ва шукуфоии Тоҷикистони азиз саҳм гузошт.

МДТ «Коллеҷи тиббии шаҳри Кӯлоб ба номи Раҳмонзода Раҳматулло Азиз» минбаъд низ дар татбиқи сиёсати давлатии муқовимат ба коррупсия саҳми арзандаи худро гузошта, ҷиҳати баланд бардоштани маърифати ҳуқуқии ҷавонон ва тарбияи мутахассисони содиқу ватандӯст тамоми тадбирҳои заруриро амалӣ менамояд.