МАВҚЕИ ПЕШОҲАНГӢ ДАР ҲАЁТИ СИЁСИИ КИШВАР

Ҳизбҳои сиёсӣ дар ҳаёти сиёсии ҳар як давлат мавқеи хоси худро доранд ва метавонанд ҳамчун нерӯи пешбарандаи ҷомеа нақши муҳим гузоранд. Аммо мутаассифона, на ҳама ҳизбҳои сиёсӣ дар ин ҷода муваффақ мешаванд. Зеро аксари ин ҳизбҳо бо нияти қудратхоҳӣ амал намуда, иродаи халқро сарфи назар мекунанд ва аз ҳамин сабаб наметавонанд дастгирии оммаро ба даст оранд.

Барои дарки мавқеи ҳизбҳо дар ҷомеа, ба воқеаҳои солҳои 90-уми асри гузашта назар кардан ҷоиз аст. Бо пош хӯрдани собиқ ИҶШС, Ҷумҳурии Тоҷикистон ҳамчун давлати тозаистиқлол ба марҳилаи пурпечутоби сиёсиву иҷтимоӣ ворид гардид.

Дар солҳои аввали истиқлолият, Ҳизби Коммунист, ки то он замон ҳизби ҳукмрон буд, нуфузу мавқеи пешинаи худро аз даст дод ва дигар натавонист нақши пешбарандаи ҷомеаро иҷро кунад. Дар натиҷаи буҳрони шадиди иҷтимоию иқтисодӣ кишвари мо ба вазъияти бисёр ҳассосу хатарнок рӯ ба рӯ шуд.

Дар чунин давраи ҳассос барои сарҷамъ намудани миллат ва роҳнамоии мардум ба сӯи сулҳу ваҳдат, ниёз ба як нерӯи сиёсие ба миён омад, ки масъулияти бузургро ба дӯш гирифта тавонад. Маҳз дар ҳамин замина Ҳизби Халқии Демократии Тоҷикистон вориди саҳнаи сиёсӣ гардид. Тавре таърих гувоҳ аст, заминаҳои таъсиси он ба Иҷлосияи XVI Шӯрои Олии Тоҷикистон марбут аст.

ҲХДТ аз рӯзҳои аввали таъсисёбиаш ҳамчун ҳизби ифодакунандаи манфиатҳои миллӣ ва ҳимоягари давлатдорӣ фаъолияти худро ба роҳ монд. Пешвои миллат, Раиси муаззами ҲХДТ муҳтарам Эмомалӣ Раҳмон таъкид намудаанд:

“Имрӯз мо бо ифтихор мегӯем, ки ҳизби мо бо мақсади ифодаи азму иродаи мардуми шарифи Тоҷикистон ташкил шуд ва ҳамчун зодаи даврони истиқлолу озодӣ рушд кард.”

То имрӯз ҲХДТ ҳамчун ҳизби халқӣ дар тамоми бахшҳои ҳаёти ҷомеа саҳми назаррас дорад. Дар тӯли 31 соли фаъолият ҳизб тавонист миёни ҷомеа мавқеи устувор пайдо кунад ва ҳамчун қувваи пешоҳанг худро муаррифӣ намояд.

Вазифаҳои асосии ҲХДТ

Дар бахши сиёсӣ:

-таҳкими соҳибистиқлолӣ;

-тақвият бахшидани низоми давлатдорӣ;

-мусаҳкам кардани ваҳдати миллӣ ва якпорчагии кишвар.

Дар бахши иқтисодӣ:

-рушди бемайлони бахшҳои калидии иқтисод;

-баланд бардоштани истеҳсоли маҳсулоти дохилӣ;

-бунёду барқарорсозии корхонаҳои саноатӣ;

расидан ба ҳадафҳои стратегии миллӣ.

Дар бахши иҷтимоӣ:

-бунёди инфрасохтори иҷтимоӣ ва ислоҳоти онҳо;

-беҳтар кардани шароити оилаҳои ниёзманд;

дастгирии ятимону маъюбон.

Дар бахши илму маориф:

-бунёди муассисаҳои томактабӣ ва мактабҳо;

такмили касбияти наврасону ҷавонон;

-ҷалби ҷавонон ба забономӯзӣ ва таҳсил дар донишгоҳҳои бонуфузи дохилию хориҷӣ.

Ҳамаи ин фаъолиятҳо саҳми арзандаи ҲХДТ-ро дар рушду пешрафти Ҷумҳурии Тоҷикистон ифода мекунанд. Бовар аст, ки ҳизб минбаъд низ ҳамчун нерӯи пешоҳанги ҷомеа ба шоистагӣ ояндаи дурахшони кишварро таъмин хоҳад намуд.