ПАРЧАМИ МИЛЛИИ ҶУМҲУРИИ ТОҶИКИСТОН РАМЗИ ПУРҚУВВАТӢ ВА ИФТИХОРИ МИЛЛӢ

Парчами давлатӣ на танҳо рамзи истиқлолияти давлатӣ, балки нишонаи ваҳдату якпорчагии миллат, ифтихори миллӣ ва шукӯҳу шарафи тоҷикон мебошад. Тоҷикистон ҳамчун давлати соҳибихтиёр ва пуриқтидор дар арсаи ҷаҳонӣ муаррифӣ шудааст. Бори нахуст Рӯзи Парчами давлатӣ дар ватани азизамон 24 ноябри соли 2009 таҷлил карда шуд.

Бо ташаббус ва иқдоми наҷиби Сарвари давлатамон муҳтарам Эмомалӣ Раҳмон бо муносибати 20 – солагии Истиқлолияти давлатии Ҷумҳурии Тоҷикистон дар пойтахти азизамон – шаҳри Душанбе бузургтарин Парчам, ки дар ҷаҳон беназир аст, гузошта шуд, ки баландии пояи он 165 метр, дарозии матоъ 60 метр ва бараш 30 метр буда, ба китоби “Рекордҳои Гиннес” ворид гардид. Майдоне, ки он ҷо Прачами бузургтарини мо ҷойгир аст “Боғи Парчами миллӣ” номгузорӣ шуд. Парчами давлатии Ҷумҳурии Тоҷикистон – рамзи соҳибистиқлолии Ватан, иттиҳоди ҷомеа, дӯстиву баробарии халқҳои сокини давлати мо мебошад. Парчами давлатии мо, анъанаҳои таърихию фарҳангии чандинасраи тоҷиконро инъикос мекунад.

Бояд таъкид намуд,ки дар зери парчами давлатӣ на танҳо истиқлолияти кишвар, балки тамоми дастовардҳои замони соҳибистиқлолӣ таҷассум ёфтаанд. Ин рамзи муқаддас моро водор месозад,ки ба арзишҳои миллӣ ва давлатдорӣ содиқ бошем, барои ободонии кишвар заҳмат кашем ва насли наврасро дар рӯҳияи ватандӯстиву худшиносӣ тарбия намоем.

Имруз мо миллати тоҷик ифтихор мекунем, ки зери роҳбарии Асосгузори сулҳу ваҳдати милли пешвои миллат, муҳтарам Эмомалӣ Раҳмон Ҷумҳурии Тоҷикистон ба як кишвари босубот пешрафта табдил ёфтааст.

Мо миллати тоҷик бояд ин рамзи муқаддасро пос дорем, ба он арҷ гузорем ва ҷавононро дар рӯҳияи ифтихор аз парчам ва муҳаббат ба ватан тарбия намоем. Хулоса, эҳтироми Парчами давлатӣ ва расидан ба қадри он аз ҷумлаи вазифаҳои ифтихорӣ ва қарзи шаҳрвандии аҳли ҷамеаи мо ба ҳисоб меравад ва моро зарур аст, ки ҳисси ифтихор аз парафшонии он дар сиришту фитрати ҳар як шаҳрванди ватандӯсту меҳанпарасти кишвар доимо пойбарҷо бошад. Имрӯз касе, ки худро шаҳрванди Ҷумҳурии Тоҷикистон ме шуморад, бояд ифтихор аз миллату давлати аҷдодӣ ва рамзҳо миллии Ватан дошта бошад ва ин муқаддасотро чун гавҳараки чашм қадр кунад ва ҳифз намояд.