АРТИШИ МИЛЛӢ-ЗОДАИ ДАВРОНИ ИСТИҚЛОЛИЯТ

“Артиш такягоҳи давлат ва сипари бо эътимодӣ  миллат аст”

                     Эмомалӣ Раҳмон

Бади пош хурдани Иттиҳоди Шӯравӣ сарфи назар аз он ки кишварро вазъи ноороми сиёсӣ ва муноқишаҳои дохили фарогир буд, Тоҷикистони тозаистиқлол ба таъсиси Қувваҳои мусаллаҳи худ шурӯъ намуд. Вале барои бунёди он ягон заминаҳои моддиву техникӣ нокифоя буданд.

18-уми декабри соли 1992 Раиси Шурои Олии Ҷумҳурии Тоҷикистон Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон “Дар бораи таъсиси Қувваҳои Мусаллаҳи Ҷумҳурии Тоҷикистон ” қарор ба имзо расонид. Артиши миллии мо дар заминаи Фронти халқи ва гуруҳҳои мусаллаҳе, ки Ҳукумати Конститутсиониро тарафдорӣ менамуданд, таъсис дода шуд.

Санаи 23-юми феврали соли 1993 нахустин паради ҳарбии Артиши миллӣ баргузор гардид, ки он рӯз расман санаи таъсисёбии Қувваҳои Мусаллаҳи Ҷумҳурии Тоҷикистон эълон карда шуд.

Нигоҳ накарда ба вазъи номусоиди сиёсӣ, иҷтимоӣ ва иқтисодӣ дар кишвар, роҳбарияти давлату Ҳукумати ҷумҳурӣ аз рӯзҳои аввал ба сохтори ташкиливу воҳидӣ, таъминоти моддиву техникӣ ва пуррагардонии сафи Артиш бо мутахассисони касбии низомиро ба роҳ монд. Дар ин замина пеш аз ҳама ба масъалаҳои таъсису таҷҳизониданӣ қисмҳои ҳарбӣ, пурра намудани ҳайати шахсӣ дар самтҳои муҳимтарини стратегияи ҳарбӣ, ҷой додани онҳо ва беҳдошти омодагии ҷангии ҳайати шахсӣ, вобаста ба имконоти мавҷуда таваҷҷуҳи хоса зоҳир карда мешуд.

 То соли 1997 Қувваҳои Мусаллаҳи Ҷумҳурии Тоҷикистон ба се навъи асосӣ, Қӯшунҳои хушкигард, Қувваҳои ҳарбӣ-ҳавоӣ ва Қӯшунҳои мудофиаи зидди ҳавоӣ иборат буд. Ба ғайр аз ҷузъу томҳои тобеи навъҳои Қувваҳои Мусаллаҳ, ҳамзамон дар тобеияти Вазорати мудофиа ҷузъу томҳои қисму воҳидҳои низомии алоҳида низ фаъолият менамоянд. Аз ҷумлаи онҳо Литсейи ҳарбӣ, Донишкадаи ҳарбӣ, Полки комендантӣ, қисмҳои ҳарбии таъминотӣ ва дигар идораҳои низомикунонидашуда мебошанд, ки аксари онҳо аз солҳои аввали ташкилёбии Артиши миллии Тоҷикистон таъсис ёфта, вобаста ба иҷрои вазифаҳои муҳими соҳавӣ корҳои зиёдеро амалӣ менамоянд. Дар натиҷаи ислоҳоти низомӣ дар Артиши миллии Тоҷикистон, ки аз рӯзҳои бунёди Қувваҳои Мусаллаҳ оғоз гардида, он ҳанӯз идома дорад, корҳои хеле зиёд ба сомон расонида шуданд. Дар ин замина Сарситод ба Ситоди генералӣ табдил ёфт. Қувваҳои ҳарбӣ-ҳавоӣ ва мудофиаи зидди ҳавоӣ муттаҳид гардонида шуд. Дар заминаи Колеҷи Олии низомӣ Донишкадаи ҳарбӣ таъсис ёфт, дар сохтори бисёре аз қисмҳои низомӣ, дигаргуниҳои зиёд ворид карда шуд ва аз ҳама муҳим бо назардошти таҳдиди хатарҳои ҷаҳони муосир навъи сеюми Қувваҳои мусаллаҳ, ё худ Қӯшунҳои зудамал дар ҳайати Артиши миллии Тоҷикистон таъсис дода шуд.

Таҳти сарварии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Тоҷикистон, муҳтарам Эмомалӣ Раҳмон,  Қувваҳои Мусаллаҳи Ҷумҳурии Тоҷикистон ҳама марҳилаҳои мушкили оғози фаолияти худро паси сар намуда, ба давраи мувофиқсозии сохтори ба воқеиятҳои амнияти байналмилалӣ ва минтақавӣ расид. Дар ин давра кӯшишу талош баҳри сайқал додани омодагии ҷангии ҷузъу томҳо, болоравии маҳорату малакаҳои касбии афсарону хизматчиёни ҳарбӣ равона карда шуд.

Ҷумҳурии Тоҷикистон кишвари сулҳхоҳ аст ва ба ҳеҷ кишвари дунё ғараз надорад. Сиёсати хориҷии он ба ҳаллу фасли тамоми муноқишаҳои минтақавӣ ва ҷаҳонӣ бо роҳи дипломатӣ равона шуда, ҷонибдори ва муносибати дипломатӣ, иқтисодию фарҳангӣ бо кишварҳои олам аст. Вале таҳаввулоти ҳарбию сиёсии ҷаҳон моро водор месозад, ки баҳри ҳифз ва таъмини сулҳу субот дар кишвари азизамон доимо омода бошем.

Барои боз ҳам баланд бардоштани маҳорати касбӣ ва фаолияти коллективӣ бар зидди хатарҳои ҷаҳони муосир, аз қабили; экстремизм ва терроризми байналмилалӣ, пешгири ва паҳншавии экстремизми динӣ, сайқал додани маҳорату малакаи ҷангии ҳайати шахсӣ дар ҳудуди Ҷумҳурии Тоҷикистон ва чӣ берун аз он пайваста бо кишварҳои хориҷи машқҳои муштараки ҳарбӣ гузаронида мешвад.

Ҳукумати Ҷумҳурии Тоҷикистон баҳри мустаҳкам намудани қобилияти мудофиявии кишвар, баланд бардоштани сатҳи омодагии ҳарбӣ,беҳтар гардониданӣ шароитҳои моддию техникӣ ва вазъи ичтимоии хизматчиёни ҳарбӣ пайваста тадбирҳо меандешад.

  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон пайваста дар баромадҳои худ таъкид месозад, ки “Мо бояд зиракӣ ва ҳушёрии сиёсиро аз даст надиҳем”.

Хизматчиени ҳарбии Қувваҳои Мусаллаҳи мо дар давоми солҳои мавҷудият дар фаолияти худ собит намуданд, ки  онҳо метавонанд бар зиддӣ ҳама гуна душванони дохиливу хориҷӣ истодагарӣ намоянд ва дар ҳифзи марзу буми хеш ҳамеша омода бошанд.

 Ҷумҳурии Тоҷикистон дар бунёди Артиши миллӣ, ки он яке аз рукнҳои асосии давлатдорӣ ва сипари боэътимоди кишвар аст, тӯли 32- соли фаолият санҷишу озмоишҳои ҷиддиро пушти сар намуда, дар роҳи баланд бардоштани қудрати дифоии ҷумҳурӣ ва ҳифзи ҳама музаффариятҳои истиқлолияти он, қадамҳои устувор мегузорад.

Дар хулосаи ин андешаҳо ҳаминро гуфтаниам, ки Артиши миллӣ ҳамчун сипари бо эътимодӣ давлату миллат, дар ҳифзи марзу буми аҷдодии мо дар ҳолатӣ омодабош қарор дошта, сол то сол боварии худро ба ин сарзаминаи муқаддас мустаҳкамтар мегардонад.

Ҳусайнов Ф.Р.

Омӯзгори МДТ “Коллеҷи тиббии шаҳри Кӯлоб ба номи Раҳмонзода Р.А.”