ПАРЧАМИ ДАВЛАТИИ ҶУМҲУРИИ ТОҶИКИСТОН-РАМЗИ ИФТИҲОР ВА ҲУВИЯТИ МИЛЛӢ

Парчами миллӣ ифодагари иқболу истиқлол, иттиҳоду сарҷамъӣ, нангу номус, ватандӯстиву ватанпарастӣ ва ҳувияти миллии мардуми куҳанбунёду фарҳангии мо буда, волотарин мақсаду мароми тоҷиконро дар ҷилои рангҳои худ инъикос намудааст.»Эмомалӣ Раҳмон

Парчами давлатии Ҷумҳурии Тоҷикистон яке аз муҳимтарин рамзҳои давлатдорӣ ва муқаддасоти миллӣ ба ҳисоб меравад. Ин нишони воло таърихи пурифтихор, арзишҳои миллӣ, ваҳдати халқ ва ормонҳои давлатдории тоҷиконро дар худ таҷассум мекунад. Парчам на танҳо як матои ранга, балки рамзи давлат, нишонаи истиқлолият ва таҷассуми ягонагии миллат мебошад.

Парчами давлатии Ҷумҳурии Тоҷикистон рӯзи 24 ноябри соли 1992, дар иҷлосияи таърихии 16-уми Шӯрои Олии кишвар қабул гардид. Он давра барои миллати тоҷик айёми бисёр сарнавиштсоз буд. Қабули парчам рамзи эҳёи давлатдорӣ, пойдории сулҳ ва оғози марҳилаи нави таърихии Тоҷикистон гардид.

Парчами Тоҷикистон аз се ранги уфуқӣ – сурх, сафед ва сабз иборат аст ва дар миёнаи он – тасвири тоҷ ва ҳафт ситора ҷойгир аст. Ҳар як рангу нишона дорои маънои амиқи рамзӣ мебошад:

Ранги сурх – рамзи ҷасорат, матонат, истиқлолият ва муборизаҳои таърихии миллат аст. Он инчунин рамзи давлати соҳибистиқлол ва зиндагии озодонаи тоҷикон мебошад.

Ранги сафед – рамзи покӣ, таҳаммулпазирӣ, адолат ва ваҳдати миллӣ. Ин ранг рамзи роҳи дурнамои кишвар ба сӯи рушд ва пешрафт аст.

Ранги сабз – рамзи табиат, сарзамини ҳосилхез, кишоварзӣ ва ободкории тоҷикон. Сабз инчунин рамзи зиндагии нав ва умед ба фардои дурахшон мебошад.

Тоҷ ва ҳафт ситора – нишонаи давлати соҳибтамаддун

Дар маркази парчам тоҷ бо ҳафт ситора ҷойгир шудааст. Тоҷ рамзи давлати соҳибтамаддун, бузургӣ ва эҳтироми миллист. Ҳафт ситора бошад, ба рамзи комилият, саодат, хушбахтӣ ва ба рақами муқаддаси ҳафт иртибот дорад. Он нишонадор мекунад, ки нияту орзуи тоҷикон ҳамеша ба сӯи камол ва саодат равона аст.

Имрӯз Парчами давлатии Тоҷикистон дар дилу дидаи ҳар шаҳрванд ҷой дорад. Парчам дар мактабҳо, муассисаҳои давлатӣ, чорабиниҳои давлатӣ ва варзишӣ бо эҳтироми хоса боло бардошта мешавад. Дар арсаи ҷаҳон варзишгарон ва намояндагони кишвар бо ифтихор парчами давлатро боло мебардоранд, ки ин нишонаи ваҳдат, ифтихор ва шарафи миллӣ мебошад.

Дар мусобиқаҳои варзишии ҷаҳонӣ, дар анҷуманҳои сатҳи байналмилалӣ ва чорабиниҳои дипломатӣ дидани Парчами давлатии Тоҷикистон эҳсоси эҳтироми шаҳрвандонро ба Ватан боз ҳам қавитар мегардонанд.

Бигзор, Парчами давлатии Тоҷикистони соҳибистиқлоли мо бар сари миллати тоҷик ва давлати тоҷикон то ҷовидон парафшон бошад ва моро ба сӯйи ояндаи ободу осуда раҳнамоӣ созад!

Хулоса Парчами давлатии Ҷумҳурии Тоҷикистон рамзи ҳамзистии осоишта, сулҳу субот ва ягонагии миллат аст. Он моро ба дӯстӣ, меҳнатдӯстӣ, ваҳдати миллӣ ва пос доштани арзишҳои давлатдорӣ ҳидоят мекунад. Эҳтиром ба Парчам – ин эҳтиром ба Ватан, миллат ва таърихи пурифтихори тоҷикон мебошад.

Лоҷварбии Амирзод

Мутахассиси шуъбаи кадрҳо ва корҳои махсус-и МДТ «Коллеҷи тиббии ш.Кӯлоб ба номи Раҳмонзода Р.А.»