30 СОЛИ ПУРИФТИХОРИ ҲХДТ ДАР ДАВРОНИ СОҲИБИСТИҚЛОЛӢ

Ҳизби Халқии Демократии Тоҷикистон — яке аз ҳизбҳои асосии сиёсӣ ва таъсиргузор дар даврони соҳибистиқлолии Ҷумҳурии Тоҷикистон ба шумор меравад.

ҲХДТ дар тӯли 30 соли фаъолияташ нақши муҳимеро дар таҳкими давлатдорӣ, ваҳдати миллӣ ва рушду пешрафти кишвар бозидааст. Ин ҳизб бо кӯшиши ҷонноки роҳбарони худ тавонист Тоҷикистонро ба сӯи рушди устувор ва ҳадафҳои стратегии миллӣ раҳнамоӣ намояд.

Ҳизби Халқии Демократии Тоҷикистон бо назардошти рушду пешрафти минбаъдаи давлати соҳибистиқлоли Тоҷикистон бо ҳамаи ҳизбҳои сиёсӣ ва дигар иттиҳодияву созмонҳои ҷамъиятӣ, ки фаъолияташон дар доираи Конститутсия ва қонунҳои амалкунандаи Ҷумҳурии Тоҷикистон сурат мегирад, ҳамкорӣ мекунад.

Таърихи таъсиси ҲХДТ ва ҳадафҳо

Дар аввали солҳои 1990-ум, Тоҷикистон дар шароити душвори қарор дошт, ки инро ба ибтидои давраи мушкили Истиқлол рабт додан мумкин аст. Муқовиматҳои дохилӣ ва вазъияти ноустувори сиёсӣ зарурати ташкили як ҳизби мустаҳкам ва боэътимодро ба вуҷуд овард. Бо ташаббуси Президенти Ҷумҳурии Тоҷикистон муҳтарам Эмомалӣ Раҳмон ва ҳамзамон роҳбари ҲХДТ, 10 декабри соли 1994 дар Анҷумани муассисони Ҳизби Халқии Тоҷикистон ташкил ёфтааст.

Дар вазорати адлияи ҷумҳурӣ 15 декабри соли 1994 таҳти рақами 199 сабти ном шуда, он ба ҳадафҳои рушди кишвар, суботу ваҳдати миллӣ, ва таҳкими ҷомеаи демократӣ равона гардидааст.

Ҳизби Халқии Демократии Тоҷикистон дар асоси Конститутсия, қонунҳои конститутсионӣ, қонунгузории ҷумҳурии Тоҷикистон ва санадҳои байналхалқии ҳуқуқие, ки Ҷумҳурии Тоҷикистон эътироф кардааст, ҳамчунин дар доираи Барнома ва Оинномаи хеш фаъолият мекунад.

ҲХДТ дар тамоми марҳилаҳои фаъолияташ кӯшиш ба харҷ додааст, ки идеологияи ватандӯстӣ ва рушди иҷтимоӣ-иқтисодиро дар ҷомеа афзоиш диҳад. Ҳадафҳои асосии ҳизб ба тавсеаи ислоҳоти иқтисодӣ, баланд бардоштани сатҳи зиндагии мардум, таҳкими амният ва истиқлоли миллӣ нигаронида шудаанд. Барномаҳои ҳизбӣ дар самтҳои гуногун, аз ҷумла, рушди иқтисодиёти миллӣ, тандурустӣ, маориф, ҳифзи иҷтимоӣ, ва беҳбудии сатҳи зиндагии аҳолӣ, тадбирҳои муҳимро дар бар мегиранд.

Инчунин ин ҳизб фаъолияти ташкилию таблиғотиашро дар асоси принсипҳои зерини демократӣ дар амал татбиқ менамояд:

— умумияти ғоявӣ, рафоқати ҳизбӣ, ягонагии манфиату ҳадафҳои ҳизб, баробарии ҳуқуқу уҳдадориҳои ҳамаи аъзоёни ҳизб, интизоми бошуурона;

— эҳтиром ба нуқтаи назари ҳар як аъзои ҳизб, худидоракунии ташкилотҳои ибтидоии ҳизбӣ, ошкорою шаффоф будани фаъолияти ҳизбии сиёсӣ;

— интихобӣ будани ҳамаи вазифаҳои роҳбарикунандаи ҳизбӣ аз поён то боло;

— ҳамеша ҳисоботдиҳанда будани мақомоти ҳизбӣ;

интизоми қатъии ҳизбӣ ва ҳатмӣ будани қарорҳои мақомоти болоии ҳизбӣ барои мақомоти поёнӣ;

— роҳбарии дастҷамъона ба ҳамаи мақомоти ҳизбӣ, масъулияти шахсии ҳар аъзои ҳизб барои иҷрои вазифаҳою супоришҳои ҳизбӣ.

Саҳми ҲХДТ дар Ваҳдати миллӣ ва иқтисоди кишвар

Яке аз муҳимтарин дастовардҳои ҲХДТ дар ин се даҳсола саҳми он, дар барқарории сулҳу субот ва ваҳдати миллӣ дар кишвар мебошад. Бо талоши роҳбарони ҲХДТ ва шахсан Пешвои миллат муҳтарам Эмомалӣ Раҳмон, Тоҷикистон аз хатари пошхӯрӣ ва бесуботии сиёсӣ наҷот ёфт. Дар натиҷаи имзои Созишномаи умумии истиқрори сулҳ ва ризоияти миллӣ соли 1997, ки ба ҷанги дохилии кишвар хотима дод, ҲХДТ ҳамчун яке аз ҳизбҳои марказӣ, дар он нақши калидӣ дошт.

Мавриди тазаккур аст, ки таҳти роҳбарии Сарвари давлат муҳтарам Эмомалӣ Раҳмон инчунин раиси ҲХДТ, иқтисодиёти Тоҷикистон дар се даҳсолаи охир тавонист ба дастовардҳои назаррас ноил гардад. Барномаҳои стратегии ҳизб, ки ба рушди инфрасохтор, таъсиси ҷойҳои нави корӣ, рушди минтақаҳои дурдаст ва ҷалби сармоягузориҳо равона шудаанд, ба рушди устувори иқтисодии кишвар мусоидат намуд.

Инчунин бо эълон намудани барномаҳои “Барномаи рушди саноат то соли 2030”, “Барномаи рушди кишоварзӣ” ва дигар барномаҳои стратегии ҲХДТ, ҳизб кӯшиш дорад, ки Ҷумҳурии Тоҷикистонро дар муддати наздик ба сатҳи нави рушд ва худкифоии иқтисодӣ расонад.

Ҷойгоҳи ҲХДТ дар ҳаёти сиёсии Тоҷикистон

ҲХДТ дар давоми фаъолияташ ҳамеша кӯшиш кардааст, ки маърифати сиёсӣ ва иҷтимоии мардумро баланд бардорад. Бо ташкил кардани мулоқотҳои роҳбарияти ҳизб бо аҳолӣ ва таблиғоти густурда дар расонаҳои давлатӣ ва васоити ахбори омма, ҲХДТ тавонистааст иртиботи бевосита бо мардумро таъмин намуда, фикру мулоҳизаҳои онҳоро дар барномаҳо ва сиёсати худ ба назар гирад.

Дар тӯли 30 соли мавҷудияташ, ҲХДТ ба яке аз қувваҳои асосии сиёсӣ табдил ёфтааст. Дар интихоботи парлумонии кишвар, ҲХДТ ба таври мунтазам дастгирии зиёди мардумро ба даст оварда, аксарияти курсиҳои парлумонро ишғол намудааст. Ин нишон медиҳад, ки ҳизб бо сиёсати худ тавонистааст эътимод ва дастгирии васеи мардумро ба даст орад.

ҲХДТ дар фаъолияти худ ба кори миёни занону ҷавонон эътибори махсус медиҳад. 3,5 ҳазор ташкилотҳои ибтидоии ҳизбӣ, ки дар ҳамаи маҳаллаю кӯчаҳо, ҷамоатҳои ҷумҳурӣ фаъолият доранд, дар сафҳояшон бештар аз 102 000 аъзои ҳизбро муттаҳид мекунанд. Аз онҳо 35 дарсадро занон ва бештар аз 48 дарсадро ҷавонон ташкил медиҳанд.

30 соли пурифтихори  ҲХДТ

Имсол, ки ҷашни 30-солагии ҳизб баргузор мешавад, бояд гуфт, ки ин маърака ҳамчун фурсати муҳим барои ҷамъбасти дастовардҳои ҳизб, нақшаҳои ояндаи он ба ҳисоб меравад.

Ҳизб аз замони таъсисёбӣ то имрӯз нақши асосиро дар идораи давлатдорӣ ва рушди устувори кишвар мебозад. Ба шарофати пуштибонии ҲХДТ ва бо роҳбарии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, кишвар ба дастовардҳои зиёди сиёсӣ, иқтисодӣ ва иҷтимоӣ ноил гардидааст. ҲХДТ фаъолияти худро асосан ба ҳифзи манфиатҳои миллӣ, суботу амнияти давлат, баланд бардоштани сатҳи зиндагии мардум ва пешбурди сиёсати хориҷӣ равона кардааст.

Имрӯз дар саросари кишвар бахшида ба ҷашни 30 — солагии ҲХДТ барномаҳои ҷашнӣ чорабиниҳои гуногуни фарҳангӣ, илмӣ ва маърифатӣ доир мегирад. Дар ҳамоишу конфронсҳо ва семинарҳо дастовардҳои ҳизб дар се даҳсола баррасӣ ва натиҷагирӣ мешавад.

Бояд гуфт, ки ҷашни 30 — солагӣ барои ҲХДТ як марҳалаи муҳиме ба шумор меравад, ки дар он ҳизб қадамҳои минбаъдаи худро барои рушди давлатдории муосир ва беҳбуди шароити зиндагии шаҳрвандони Ҷумҳурии Тоҷикистон равона мекунад.

Хулоса

Ҳизби Халқии Демократии Тоҷикистон дар 30 соли фаъолияташ тавонист як заминаи устувори сиёсӣ, иқтисодӣ ва иҷтимоиро барои кишвар фароҳам орад. Саҳми он дар таъмини сулҳ, рушди иқтисодӣ ва ваҳдати миллӣ назаррас буда, барои ояндаи дурахшони Тоҷикистон роҳ кушодааст. Ин санаи таърихӣ на танҳо як марҳалаи муҳими сиёсӣ аст, балки нишони рушди муназзами ҷомеаи Тоҷикистон ва нақши муҳимми ҳизб дар таъмини амният ва пешрафти кишвар мебошад.

Маҳмудзода Қумринисо Нуралӣ.

Муовини директор оид ба корҳои илмӣ ва робитаҳои байналмилалии МДТ «Коллеҷи тиббии ш.Кӯлоб ба номи Раҳмонзода Р.А.«