70 СОЛАГӢ МУБОРАК!

        МДТ “Коллеҷи тиббии шаҳри Кӯлоб ба номи Раҳмонзода Раҳматулло Азиз” яке аз калонтарин муассисаи таҳсилоти миёнаи касбӣ дар ҷумҳурӣ ба шумор меравад, ки тӯли 70 соли фаъолияташ дар омодасозӣ ва таъмини соҳаи тандурустии кишвар бо кормандони миёнаи тиббӣ нақши босазо дорад. Ҳоло дастпарварони коллеҷ на танҳо дар Ҷумҳурии Тоҷикистон, балки берун аз он кору фаъолият намуда истодаанд.

     Фаъолияти ин даргоҳи дониш аз соли 1953 оғоз гардидааст. Бо фармони шуъбаи тандурустии вилояти Кӯлоб аз 14 октябри соли 1953, № 01/10 Мактаби тиббии ш. Кӯлоб таъсис дода шуд, ки ин нахустин муассисаи таълимии касбӣ дар вилоят буд. Аввалин директори мактаби тиббӣ Г. Чеботарёва буданд, ки дар оғози фаъолияти муассиса ва рушди он саҳми босазо гузоштаанд. Бо мурури замон бо фармони Вазорати тандурустии ҶШС Тоҷикистон аз 8 июли соли 1954, №112 мактаби тиббӣ ба Омӯзишгоҳи тиббии шаҳри Кӯлоб табдил дода шуд. Таҳсил дар омӯзишгоз се солро дар бар гирифта, дар он аз рӯи ихтисоси ҳамшираи тиббӣ мутахассис омода карда мешуд. Соли аввали таҳсил (1953–1954) аввалин маротиба 60 нафар довталабон аз рӯи ихтисоси ҳамшираи тиббӣ ба омӯзишгоҳи тиббӣ қабул карда шуданд. Соли 1956 омӯзишгоҳро аввалин шуда 48 бо ихтисоси ҳамшираи тибӣ хатм намуданд.

      Тадриҷан, вобаста ба талаботи соҳаи тандурустӣ теъдоди муҳассилин ва хатмкунандагони муассиса меафзуд. Солҳои панҷоҳум давра ба давра сохтори таълимӣ-тарбиявии омӯзишгоҳ таҳким ёфт ва заминаи моддию техникии он пурзӯр гардид. Дар омӯзишгоҳ омӯзгорони соҳибтаҷриба ба муҳассилин дарс мегуфтанд. Ҳамин тариқ ҳамасола омӯзишгоҳро шумораи муайяни мутахассисон хатм мекарданд: соли 1957-50 нафар, соли 1958-85 нафар, соли 1959-116 нафар, соли 1960-112 нафар. Соли 1964 муассисаро 240 нафар хатм намуда, соҳибкасб гардиданд.

      Аввалин омӯзгорони муассиса Денисов А.Д., Кадюшкин Ю.А., Карачевский Е.М., Лопатина Р.И., Бобоҷонов Т., Шулятев В., Пулатов Т.П., Қурбонов Ш. ва дигарон буданд, ки маҳорати баланди касбӣ доштанд.

       Тӯли 70-соли фаъолияти муассиса онро мутахассисони варзида Пулатов Т.П. (1954–1955), Шмегевский С.А. (1955), Постников М.В. (1955–1958), Доррадж М.М. (1958), Валиев Д.С. (1959–1961), Чеботарёва Г. (1961–1962), Пулатов Т.П. (1962–1964), Расулов Н.Р. (1964-1967), Пулатов Т.П. (1967–1970), Ҳасанова И. (1970–1980), Содиқова Ҳ.С. (1980–1983), Алиева Д.Н. (1983–1990), Гадоев Б.Ш. (1990–1999), Холназаров С. (1999–2011) ва Назарзода Ҷ.Ш. (2011–2020) роҳбарӣ намудаанд. Роҳбарии имрӯзаи коллеҷро доктори илмҳои тиб Азиззода Зубайдулло Абдулло ба ӯҳда дорад.

      Солҳои минбаъда баробари рушди иқтисоди ҷумҳурӣ низоми шароити таълим низ дар Омӯзишгоҳи тиббӣ такмил ёфта, дар он аз рӯи ихтисосҳои фелдшерӣ, момодоягӣ ва дандонсозӣ мутахассисони миёнаи тиб омода карда мешуданд. Бо мақсади таъмини муассисаҳои тандурустии минтақаи Кӯлоб бо мутахассисон дар назди беморхонаҳои ноҳияивии ноҳияҳои Ҳамадонӣ, Фархор, Восеъ, Темурмалик, Ховалинг ва Муъминобод гурӯҳҳои мақсаднок ташкил карда шуда буданд.

      Соли 1996 дар фаъолияти муассиса таҳаввулоти нав ба миён омад. Бо қарори Ҳукумати Ҷумҳурии Тоҷикистон аз 23-юми декабри соли 1996, № 91 омӯзишгоҳ ба Коллеҷи тиббии шаҳри Кӯлоб табдил дода шуд. Ҳамзамон дар он ихтисосҳои нави кори табобатӣ ва кори момодоягӣ бо мӯҳлати таҳсили чорсола ба роҳ монда шуд.

        Ҳоло дар коллеҷ зиёда аз 3500 нафар донишҷӯён таҳсил доранд, ки ба онҳо 200 нафар омӯзгорони асосӣ дарс мегӯянд. Аз миёни онҳо як нафар доктори илмҳои тиб, ду нафар номзади илмҳои тиб, як нафар номзади илмҳои филологӣ ва як нафар номзади илмҳои педагогӣ мебошанд.

     Се нафар кормандони муассиса бо медали “Хизмати шоиста”, 14 нафар бо медали “Аълочии тандурустї”, 38 нафар бо медали “Аълочии маориф ва илми Тољикистон” ва 10 нафар бо медали “Корманди шоистаи варзиши Ҷумҳурии Тоҷикистон” сарфароз гардонида шудаанд.

      56 (24,8%) нафар ба ҳайси омӯзгори калон, 55 (24,4%) – нафар ба ҳайси ассистенти кафедра,  ва 114 (50,6%)– нафар дар вазифаи омўзогори кафедра  фаъолият мекунанд.

      Як қатор аз дастпарварони Коллеҷи тиббии ш. Кӯлоб таҳсили худро дар муассисаҳои олии таълимии дохил ва хориҷи кишвар идома дода, то дараҷаҳои мутахассисони дорои унвон ва дараҷаҳои баланди тахассусӣ ва илмӣ расида, ба ҳайси роҳбарони вазорату муассисаҳои илмӣ кору фаъолият намудаанд. Аз ҷумлаи онҳо д.и.тиб, профессор Файзуллоев Н.Ф., д.и.тиб, профессор Ибодов Ҳ.И., д.и.тиб, профессор Азонов Ҷ., д.и.тиб, профессор Қурбонов С.С., д.и.тиб, профессор Ғоибов А.Ғ., д.и.тиб Қурбонов Ҳ.Ҳ., д.и.тиб Сафарзода А.М., д.и.тиб Раҳмонов Х., н.и.биология Зиё Раҳмон, н.и.т., Чиллазода Б., Атоев Д., Холназаров С., Ҳакимов Б., Сангимадов Х. ва дигарон на танҳо дар дохил, балки дар хориҷи кишвар номдор гашта, бе муболиға на танҳо ифтихори мо балки ифтихори миллат маҳсуб меёбанд.

       Ҳоло, дар коллеҷ аз рӯи 7 ихтисос: «Кори момодоягӣ», «Кори табобатӣ», «Кори ҳамширагӣ», «Кори тиббию-профилактикӣ», «Кори фарматсевтӣ», «Кори дандонсозӣ», «Кори тиббию-ташхисӣ» мутахассисони миёнаи тиб омода карда мешаванд.

        Дар коллеҷ 16 кафедраи таълимӣ таъсис дода шудааст, ки роҳбарии онҳоро омӯзгорони дорои унвони илмӣ ва ё дараҷаи баланди тахассусӣ дошта роҳбарӣ менамоянд.

         Соли 2023 аз фаъолияти пурсамари ин даргоҳи дониш 70 сол пур мешавад. Ҳайати омӯзгорони коллеҷ сиёсати хирадмандона ва маорифпарваронаи Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро ҳамаҷониба дастгирӣ намуда, минбаъд низ баҳри гулгуншукуфоии ватани азизамон ва омода намудани мутахассисони ҷавобгӯ ба талаботи бозори меҳнат саъю кӯшиш намоем.

        70 – умин солгарди фаъолияти муассиса муборак бошад устодон, хатмкардагон, ҳайати кормандон ва донишҷӯёни азиз!

Азиззода З.А., доктори илмҳои тиб, директори МДТ “Коллеҷи тиббии шаҳри Кӯлоб ба номи Раҳмонзода Раҳматулло Азиз”

Пеш 1 то 11 саҳифа Баъдӣ