НИШАСТИ МАТБУОТӢ ДАР МДТ “КОЛЛЕҶИ ТИББИИ ШАҲРИ КӮЛОБ БА НОМИ РАҲМОНЗОДА Р.А.”

       Санаи 7 – уми феврали соли 2022 мутобиқи нақшаи ташкил ва гузаронидани нишасти матбуотӣ бо роҳбарони идораҳо, ташкилоту муассисаҳои вилоятӣ ва раисони шаҳру ноҳияҳо оид ба ҷамъбасти соли 2021 мутобиқи Амри Президенти Ҷумҳурии Тоҷикистон аз 15 сентябри соли 2011, №1729, ки аз тарафи раиси вилояти Хатлон, муҳтарам Қурбон Ҳакимзода аз 27 январи соли 2022 тасдиқ карда шудааст дар МДТ “Коллеҷи тиббии шаҳри Кӯлоб ба номи Раҳмонзода Р.А.” нишасти матбуотӣ баргузор гардид.

       Зимни нишаст сараввал директори муассиса Азиззода З.А. оид ба натиҷаи фаъолияти коллеҷ дар соли 2021 гузориш дод. Ӯ аз ҷумла қайд намуд, ки тули солҳои охир заминаи моддию техникии муассиса таҳким ёфта, айни замон он дорои чор бинои таълимӣ, хобгоҳ барои донишҷўён, марказҳои таълимию табобатӣ, 141 кабинетҳои таълимӣ, 3 синфхонаи компютерӣ, майдончаи варзишӣ, як толори варзишӣ, китобхона ва толори маҷлисӣ барои 110 нафар мебошад.

       Ҳоло таъмири капиталии бинои асосии муассиса идома дорад.

     Қайд карда шуд, ки дар муассиса сохтмон ва ба истифода додани бинои иловагии таълимӣ иборта аз ду толори лексиони барои 120 нафар ҷойи нишаст ба нақша гирифта шудааст. Айни замон корҳои иҷозатномагирӣ ва лоиҳакашӣ идома доранд.

     Сохтмони бинои хобгоҳ барои донишҷӯён иборат аз 9 ошёна барои 700 нафар донишҷӯ идома дорад.

    Раванди таълим бо ҷиҳози электронӣ ва аёнӣ таъмин шуда истодааст. Айни замон шумораи компютерҳо дар Коллеҷ 151-адад, принтерҳо 41-адад, тахтаҳои электронӣ 12, проектори мултимедӣ 13 ададро ташкил медиҳад.

       Дар коллеҷ аз руйи 7 ихтисос мутахассисони миёнаи тиббӣ омода карда мешаванд. Ба донишҷӯён дар 16 кафедраҳои тахассусӣ ва ғайритахассусӣ, ки роҳбарии онҳоро омӯзгорони соҳиби дараҷаи илмӣ ва ё тахассусӣ роҳбарӣ менамоянд дарс хонда мешавад.

        Дар соли 2021- ум аз тарафи омӯзгорони кафедраҳои гуногун 35 дарси кушоду  намунавӣ, 8-конференсияи илмӣ — сиёсӣ, 15-конференсияи илмӣ — назариявӣ, 3 викторинаи фаннӣ, 13- озмунҳои касбии тахассусӣ ташкилу баргузор карда шудаанд.

         Донишҷӯён дар озмунҳои ҷумҳуриявии “Фурӯғи субҳӣ доноӣ китоб аст” ва “Илм фуруғи маърифат” иштирок намуда, соҳиби ҷойҳои ифтихорӣ гаштаанд.

     Соли гузашта коллеҷро 1152 нафар донишҷӯён хатм намуда, барои кору фаъолият ба муассисаҳои тандурустии кишвар сафарбар карда шудаанд.

     Ба коллеҷ дар соли 2021 – 1197 нафар донишҷӯён қабул шудаанд.

      Дар коллеҷ мунтазам чорабиниҳои гуногуни таълимию илмӣ ва тарбиявӣ бо ҷалби сершумори омӯзгорон ва донишҷӯён ташкилу баргузор карда мешаванд.

      Дар соли 2021 ба китобхона 3 483 адад китобҳои тахассусӣ ворид карда шудааст. Айни замон дар хазинаи китобхона ҳамагӣ 22 256 адад адабиёти таълимӣ мавҷуд аст. Ҳамчунин дар назди китобхона, китобхонаи электронӣ бо 10 адад компютер ва 1 адад принтер пайваст бо хати интернетӣ фаъолият менамояд. Хазинаи китобхонаи электронӣ зиёда аз 10 000 нусха адабиёти таълимиро дар шакли электронӣ дар бар мегирад, ки донишҷӯён ва омӯзгорон аз он васеъ истифода менамоянд.

      Дар Коллеҷ 194-нафар омўзгорон фаъолият менамоянд. 14 нафар омӯзгорони Коллеҳ бо медали “Аълочии тандурустӣ” ва 36 нафари онҳо бо медали “Аълочии маорифи Тоҷикистон” қадрдонӣ шудаанд. Дар  коллеҷ 6 нафар омӯзгорони унвони илмӣ дошта фаъолият доранд, аз ҷумла 1 нафар доктори илмҳои тиб, 2 нафар номзади илмҳои тиб, 1 нафар номзади илмҳои филологӣ ва 2 нафар номзади илмҳои педагогӣ.

        Соли 2021 бо дасгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи амалисозии лоиҳаи “Беҳтар намудани хизматрасонии тиббӣ ба модар ва кӯдак”, ки бо дасгирии Хазинаи Нуфузи СММ ва Бонки Исломии Рушд, амалӣ карда мешавад ду синфхонаи таълимӣ барои беҳтар намудани омӯзиши фанҳои “Момоӣ ва бемориҳои занона” ба истифода дода шудааст. Синфхонаҳои мазкур бо мизу курсӣ, муляжҳо, кондитсионер ва аёнияти таълимӣ муҷаҳҳаз гардонида шуданд.

       Аз тарафи роҳбарияти коллеҷ, иттифоқҳои касабаи омӯзгорон ва донишҷӯён пайваста ба омӯзгорону донишҷӯёни ниёзманд кӯмакҳои пулӣ ва маводи хӯрока расонида мешавад.

     Дар баробари дастовардҳо як қатор камбудию норасоиҳо, аз ҷумла норасоии аёниятҳо барои як қатор машғулиятҳо, норасоии адабиёти таълимӣ қайд карда шуданд.

        Азиззода З.А. қайд намуданд, ки коллективи муассиса дар оянда ба нақша гирифтааст корҳоро оид ба беҳтар намудани заминаи моддию техникии муассиса, баланд бардоштани дараҷаи тахассуснокии омӯзгорон, таъмин намудани раванди таълим бо ҷиҳози муосири таълимӣ ва ба ин васила баланд бардоштани сифати омодасосии мутахассисони миёнаи тиббӣ саъю кӯшиш намояд.

         Намояндагони васоити ахбори омма доир ба паҳлӯҳҳои гуногуни фаъолияти муассиса ба роҳбарияти коллеҷ саволҳо пешниҳода намуда, ба онҳо ҷавобҳои мушаххас гирифтанд.

Пеш 1 то 6 саҳифа Баъдӣ